ಸಣ್ಣದೊಂದು ಮಳೆಯಾಯ್ತು ನಮ್ಮೂರಿನಲಿ

 ಕಾದು  ಬೆಂದ  ಧರಣಿಯ  ದಾಹ 

ನೀಗಿಸಲು ,

ಸಣ್ಣದೊಂದು ಮಳೆಯಾಯ್ತು ನಮ್ಮೂರಿನಲಿ ।।

ಹಸಿರ ಬಸಿರ ಉಸಿರ ನೀಡಲು, ಕಾಯುತಿರುವ 

ಧರೆಯ ತಂಪಾಗಿಸಲು,

ಸಣ್ಣದೊಂದು ಮಳೆಯಾಯ್ತು ನಮ್ಮೂರಿನಲಿ ।।

ಧೂಳಿನ ಕಣದ ನಡುವಿನಲಿ, ಹನಿಯ ಇರುವಿಕೆ 

ತೋರಲು ,

ಸಣ್ಣದೊಂದು ಮಳೆಯಾಯ್ತು ನಮ್ಮೂರಿನಲಿ ।।

ಮೂಲೆಯಲಿ ಉಳಿದ ಛತ್ರಿಗಳು, ಬಿಸಿಲ ಕಂಡ

ಕೊಡೆಗಳ ನಲಿವಿಗೆ ,

ಸಣ್ಣದೊಂದು ಮಳೆಯಾಯ್ತು ನಮ್ಮೂರಿನಲಿ ।।

ಕಾಗದದ ದೋಣಿಯ ನೆನಪು ತರಿಸಲು,

ನೆನಪಿನ ಬುತ್ತಿಯ ಚಿತ್ರ ಬಿಡಿಸಲು,

ಸಣ್ಣದೊಂದು ಮಳೆಯಾಯ್ತು ನಮ್ಮೂರಿನಲಿ ।।

ಮನಸಿನ ನೋವಿನ ಮರೆಯಲಿ, ನಗುವಿನ 

ಆಗಮನ ಅಚಾನಕ್ ಎಂದು,

ಸಣ್ಣದೊಂದು ಮಳೆಯಾಯ್ತು ನಮ್ಮೂರಿನಲಿ ।।

ಚಿಗುರಿನ ತೆನೆಯ ನಡುವೆ, ಸೂರ್ಯನ ಕಿರಣಗಳ 

ಚೆಲ್ಲಲು, ಮುಗಿಲ ಅಂಚಿನ ಮರೆಯಲಿ ,

ಸಣ್ಣದೊಂದು ಮಳೆಯಾಯ್ತು ನಮ್ಮೂರಿನಲಿ ।।

ಯುಗ ಯುಗ ಕಳೆದರೂ, ನವ ವರುಷದ ರಂಗೋಲಿಯ 

ಚಿತ್ತಾರ ಬಿಡಿಸುವೆನೆಂದು, 

ಯುಗಾದಿಯ ಮಳೆಯಾಯ್ತು ನಮ್ಮೂರಿನಲಿ।।