ನೀನೇ

ಪುಟ್ಟ ಪುಟ್ಟ ಹೃದಯದ ಒಲವಿದು
ಚಿಕ್ಕ ಚಿಕ್ಕ ಕಣ್ಣಿನ ದೊಡ್ಡ ಕನಸಿದು
ಸಣ್ಣ ಸಣ್ಣ ಪದಗಳ ಕವನವಿದು
ಹೇಗೆ ಇದನು ನಾ ರಚಿಸಲಿ
ಆ ಹೃದಯದಲಿ ನೀನೇನೇ
ಆ ಕನಸು ನಿನದೇನೆ
ಆ ಕವನ ನಿನ್ನ ನೆನಪೇನೆ!
ಹೇಗೆ ನಾ ಅದನು ತಿಳಿಸಲಿ ।।

ಜೀವವ ಕೊಟ್ಟವನೇ; ಜೊತೆಯಲಿ ಬಂದವನೇ
ನನ್ನ ಜೀವನ ನೀನೇನೇ;
ಹೃದಯದ ಬಡಿತದಲಿ ಒಲವನು ಕೊಟ್ಟವನೇ
ಪ್ರೀತಿ ಪ್ರೇಮ ಎಲ್ಲಾ ನೀನೇ,
ನೋವ ಸುಳಿಯಿಂದ ಹೊರಗೆಳದು ತಂದವನೆ
ನನ್ನ ತುಟಿಯ ನಗು ನೀನೇನೆ ।।

ಸ್ನೇಹದ ಎದುರಲ್ಲಿ ಪ್ರೀತಿಯ ಅಡಿಯಲ್ಲಿ
ಹೃದಯ ಬಡಿತ ಅರಿತವನೇ
ಬೆಳಕಿನ ಕಿರಣದಲಿ, ನೆರಳಿನ ಹೆಜ್ಜೆಯಲಿ
ನಾಡಿಯ ಮಿಡಿತ ನೀನೇ;
ರವಿಯ ಬೆಳಕಂತೆ ಬಾನಿನ ರಂಗಂತೆ
ನಿರ್ಮಲ ನದಿ ನೀನೇ .... ।।

ಕಣ್ಣಾಗಿ ಬಂದವನೇ ಕನ್ನಡಿ ಆದವನೇ
ನನ್ನ ಮನಸಿನ ಆಳ ನೀನೇ
ಬಣ್ಣಗಳ ತಂದವನೆ ಬೆಳಕಾಗಿ ಬಂದವನೇ
ಆ ಬಣ್ಣಗಳ ತಾರೆ ನೀನೇ
ಕಮಲದ ಹೂವಂತೆ, ನೀರಿನ ಮುತ್ತಂತೆ
ನನ್ನೊಳಗೆ ನೀನೇ .... ।।

ನಾನಿರುವೆ

ನಾನಿರುವೆ ನಿನಗಾಗಿ ನಾನಿರುವೆ ನಿನಗಾಗಿ
ನೋವಿನಲ್ಲಿ ನಿನ್ನ ಕಣ್ಣೀರ ಹನಿಯಾಗಿ
ನಿನ್ನ ಹೃದಯ ತುಂಬುವ ಒಲವಾಗಿ
ನಿನ್ನ ತೊಳ ಆಸರೆಯಾಗಿ।।

ನಾನಿರುವೆ ನಿನಗಾಗಿ ನಾನಿರುವೆ ನಿನಗಾಗಿ

ಮೃದುವಾದ ನಿನ್ನ ನಿಶ್ಚಲ ಪ್ರೀತಿ
ಸಂತಸ ತರುವ ನಿನ್ನ ನಗುವಿನ ರೀತಿ
ತಾಳಕೆ ಸೇರುವ ನಿನ್ನಯ ಶೃತಿ
ಎಲ್ಲದರ ಜೊತೆ ಸೇರಿ ....

ನಾನಿರುವೆ ನಿನಗಾಗಿ ನಾನಿರುವೆ ನಿನಗಾಗಿ

ಅಳುಕದಿರು ಅಂಜದಿರು
ಪ್ರೀತಿ ನಮ್ಮ ಜೊತೆ ಇದೆ ಧೈರ್ಯಗುಂದದಿರು
ಹೆಜ್ಜೆ ಹೆಜ್ಜೆಗೆ, ನಿನ್ನ ನಾಡಿಯ ಮಿಡಿತಕೆ 
ಉಚ್ವಾಸ ನಿಚ್ವಾಸದ ಜೊತೆಗೆ...

ನಾನಿರುವೆ ನಿನಗಾಗಿ ನಾನಿರುವೆ ನಿನಗಾಗಿ

ಸಾಕು ನಮಗೆ ಜಗದ ಜಗಳ
ತಿಳಿದಿದೆ ನಮಗೆ ನಮ್ಮ ಪ್ರೀತಿಯ ಆಳ
ನಮ್ಮಿಬ್ಬರ ಹೃದಯ ತಿಳಿಯಾದ ಸ್ನೇಹದ ಕೊಳ
ನಿಶ್ಚಿಂತೆಯಿಂದಿರು ನನ್ನೊಲವೆ ....

ನಾನಿರುವೆ ನಿನಗಾಗಿ ನಾನಿರುವೆ ನಿನಗಾಗಿ