ಹಿಮದ ಪರ್ವತ

ಕಣ್ಣು ನೋಡಿದಷ್ಟು ದೂರ
ಮನವ ಸೆಳೆವ ಆ ಪರ್ವತಗಳ ಆಕಾರ
ಹಸಿರು ಹೊದಿಗೆಯ ಮೇಲೆ ಬಿಳಿ ಶಿರ
ಆ ಪ್ರಕೃತಿಯ ಮುಂದೆ ನಮ್ಮ ಜೀವನ ನಿರಾಕಾರ
ಆ ಸೌಂದರ್ಯದ ಕರ್ತೃಗೆ ದೀರ್ಘದಂಡ ನಮಸ್ಕಾರ

ಆಕಾಶದ ಎತ್ತರಕೆ ಬೆಟ್ಟಗಳ ಸೆಣಸಾಟ
ಒಮ್ಮೆ ಬೆಳಕು ಒಮ್ಮೆ ನೆರಳಿನ ಆಟ
ಮುಗಿಲಿನ ನಡುವೆ ರವಿಯ ಕಿರುನೋಟ
ಹಿಮದ ಮಣಿಗಳ ಸುಂದರ ಮುಕುಟ

ಸುರಿವ ಹಿಮದ ನಡುವೆ ನಮ್ಮ ಪಯಣ
ನಡೆದಾಡಿದ ಕಡೆಯಲ್ಲೆಲ್ಲಾ ನಮ್ಮ ಹೆಜ್ಜೆಯ ಬಣ್ಣ
ಈ ಭುವಿಯಲ್ಲಿ ಈ ತರ ಅದೆಷ್ಟೋ ತಾಣ
ಮಾನವನಿಗೆ ತಿಳಿಸಿಕೊಡುವುದು ಅವನ ಸ್ಥಾನ

ಬೆಳಕಲಿ ಕಾಣುವ ಈ ಬೆರಗು ಪರಿಸರ
ಕತ್ತಲಲಿ ಕಾಣುವುದು ಅತಿ ಭಯಂಕರ
ಉಳಿಸಿ ಬೆಳಸಿ ನಮ್ಮ ಭೂಮಿಯ ನಿರಂತರ
ನಮ್ಮ ಜೀವನವಾಗುವುದು ಆಗ ಸಾಕಾರ